Røtene våre, dikt av Lisbet Lid Venås
Frå Vaksdal Historielag
Røtene våre
Av Lisbet Lid Venås.
Graset heime
hadde ein annan dåm
enn gras andre stader, særleg når ein kom
frå tronge smog i byen,
og fekk fylla lungene,
blodet og tomrommet
med angen av det grøne
graset heime.
Elva heime
hadde ein annan song
enn andre elvar,
ho lærde oss den fyrste tonen
i livet, og gav oss ein smak
av stein og urørde kjelder,
ein song og ein smak
det var godt å ha med seg på vegen.
Folk heime, dei
brukte eit mål vi skjøna.
Vendingar og tonefall
fortalde meir enn det
som vart sagt.
Orda deira synte oss bilete
frå farne år
kvar gong vi kom heimatt
på leiting
etter røtene våre.
